ВМРО-ДПМНЕ: Се игнорира и изигрува волјата на мнозинството

Извршниот комитет на ВМРО-ДПМНЕ синоќа на седница, анализирајќи ја актуелната политичка состојба во државата, оцени дека е погазено правилото на коалицирање на победничките партии во македонскиот и албанскиот блок, без разлика дали ДУИ ќе одлучи да коалицира со СДСМ или само ќе даде поддршка за формирање на малцинска влада без да учествува во идната извршна власт – соопштија денеска од партијата.

Во соопштението од ВМРО-ДПМНЕ се наведува дека како партија се спротиставуваат на обидите да се игнорира и изигра волјата на мнозинството Македонци, но и волјата на припадниците на останатите етнички заедници кои својот глас го дале за Коалицијата „За подобра Македонија“.

– Реализацијата на платформата од Тирана и обидите преку наметнувањето на албанскиот јазик како официјален, претставува редефинирање на Република Македонија и оди спротивно на мултиетничкиот карактер на државата, ставајќи ги припадниците на останатите етнички заедници во подредена позиција – се вели во соопштението.

Според ВМРО-ДПМНЕ, дел од членовите на Предлог законот за јазици на којшто се согласил СДСМ, а биле обелоденети во медиумите, се целосно неприфатливи и исклучително опасни и штетни по државните и националните интереси.

– Ваквите предлози и отстапки на СДСМ може да предизвикаат долгорочна штета и носат огромен потенцијал за да предизвикаат тензии и нестабилност на подолг период. Истовремено, голем дел од решенијата кои беа обелоденети со ништо нема да им помогнат за подобар живот на албанците во Македонија. Одговорноста за ваквата ситуација е целосно на товар на СДСМ кој не ја доби поддршката од граѓаните на предвремените парламентарни избори и се обидува на срамен начин, преку тргување со државните и национални интереси да обезбеди поддршка за формирање влада – нагласува ВМРО-ДПМНЕ.

Извршниот комитет, како што се посочува во соопштението, заклучил дека партијата и избраните пратеници ќе се спротивстават на донесувањето на ваков закон и ќе преземат соодветни мерки за да ја заштитат волјата на мнозинството.

Би те интересирало и

Луиза Винтон: Една од три жени изложена на некаква форма на насилство

Една од три жени или девојчиња е изложена на одреден облик на насилство во глобални ...

Револтирани работници реагираа пред капиите на Фени: Сметаат дека им се пласираат лажни информации

Револтирани работници денеска реагираа  пред капиите на Фени дека им се пласираат лажни информации од ...