Одложено судењето за обвинетите за насилствата во Собранието

Во скопскиот Кривичен суд денеска беше одложено првото рочиште за деветмината обвинети за насилствата во македонското Собрание што се случија на 27 април. Судењето е одложено за 23. мај поради неприсуство на еден од обвинетите, кој требаше да биде донесен од домашен притвор. Тие се товарат за учество во толпа што ќе стори кривично дело и учество во топла што ќе спречи службено лице во вршењето на службени дејства.

Во Судот се повикани како сведоци и други лица, меѓу кои припадници на обезбедувањето на лидерот на СДСМ Зоран Заев, членови на внатрешното обезбедување на Собранието на РМ и обезбедувањето на поранешниот министер за внатрешни работи Оливер Спасовски. За насилствата во Собранието осомничени се триесетина лица од кои на поголем дел им се изречени мерки на претпазливост, на дел куќен притвор, а двајца, односно татко и син, се во притвор за обид за убиство.

Во настаните на 27 април беа повредени неколкумина пратеници меѓу кои најтешко лидерот на Алијансата на Албанците, Зијадин Села.

МВР соопшти дека работи на пронаоѓање на сите осомничени лица и на целосно расчистување на настаните.

Пред зградата на Основниот суд Скопје 1 денеска е собрана група граѓани кои во поддршка на осомничените имаат истакнато транспарент „Верував во се, но не дека моите ќе ми судат за Македонија“, а развеани се и знамиња со сонцето на Вергина. Во групата се припадници на неколку здруженија, меѓу кои и на „Ќосето“, како и членови на семејствата и пријатели на осомничените.

Претседателот Ѓорге Иванов во вчерашното интервју за ТВ Канал 5 го повика Собранието на РМ да одлучи за евентуална амнестија на учесниците во собраниските инциденти, бидејќи, како што наведе, тоа се луѓе кои биле заведени од толпа или од емоции.

Би те интересирало и

Виница: Вооружени крадци ги затвориле вработените во тоалет и го ограбиле казиното

Двајца маскирани крадци вооружени со пиштоли изутринава околу 6.15 часот го ограбиле казиното на улицата ...

Користејќи туѓ Фејсбук профил зел 600 евра од негови пријатели

Вчера околу 17 часот З.М. (55) од гостиварското село Чајле, пријавил компјутерска измама од засега ...