Пред претстојниот продолжен викенд пред празникот Свети Климент, плановите за сончево солунско кафе лесно можат да паднат во вода на нашите сонародници. Имено, по синоќешниот состанок на грчките земјоделци, блокадите не само што не се прекинуваат, туку се подготвуваат нови на повеќе делници низ Грција.
Една од најважните блокади е пред Евзони, каде од 1 декември се поставени трактори и други земјоделски машини. Земјоделците од пошироката област продолжуваат со симболични блокади на влезот и излезот, дозволувајќи им премин само на камионите што превезуваат грчки производи и возила во итни случаи. Мобилизациите на местото се одвиваат главно напладне и навечер. Денес, на местото се очекуваат дополнителни земјоделци од Јаница, Пела, кои на своето собрание одлучија да се движат кон царинската испостава Евзони.
Како што пишува Катимерини, По синоќешниот собир, земјоделците и сточарите од Лерин одлучија денес да одржат марш со своите трактори и земјоделски возила низ градот и да се упатат кон царинската испостава Ники, на границата меѓу Грција и Македонија.
„Утре, петок (5.12), земјоделци и сточари од Епаноми, Трилофо, Василика, Халкидики, Галатиста и Триглија, ќе постават земјоделска блокада кај „Зелените светла“, на клучната раскрсница пред аеродромот „Македонија“, како што одлучија на нивниот состанок синоќа. Вечер во 20:00 часот, земјоделци и сточари од Општина Лагада и пошироката област закажаа општ состанок со цел да го „заклучат“ денот и времето кога ќе постават блокада на раскрсницата Дервени, која се наоѓа на раскрсницата на стариот национален пат Солун-Кавала со други патни артерии, како што е патот што води кон Н. Санта Кукуш, пишува весникот.
Производителите од префектурата Серес поставија блокада на царинската испостава Промахонас, на границата меѓу Грција и Бугарија, и пристигнаа на местото по шест часа, поради полициски блокади по патот од раскрсницата Лефконас. Пчеларите и претставници на други синдикати учествуваат во мобилизацијата на местото.
Денеска на пладне тие ќе одржат генерално собрание за да одлучат каква стратегија ќе следат и дали ќе дозволат премин на камиони што превезуваат грчки производи, бидејќи нивниот став за меѓународниот транспорт е негативен.
Нивните барања вклучуваат – меѓу другото – итна исплата на заостанатите пари за помош и надоместоци, намалување на трошоците за производство и поддршка на сточарите погодени од сипаници, кои, како што истакнуваат, се наоѓаат во критична точка во однос на продолжување на својата дејност.
Да заклучиме, пред тргнување, добро проверете каде се блокадите, кои засега остануваат по главните грчки патишта.
