Авионот во кој се возела Урсула фон дер Лајен до Пловдив во недела попладне останал без електронски помагала за навигација додека се приближувал кон аеродромот. Се сомнева дека станува збор за руски напад насочен кон претседателот на Европската комисија.
Тројца службеници запознаени со инцидентот што ги оневозможи GPS навигациските услуги на бугарската воздушна граница и го принуди авионот на претседателот на Европската комисија да слета со помош на хартиени карти, рекоа дека станува збор за руска операција, пишува „Фајненшл тајмс“.
„GPS-от во целата област на аеродромот се исклучи“, рече еден од службениците.
По еден час кружење околу аеродромот, пилотот на авионот донел одлука да изврши рачно слетување со помош на аналогни карти.
„Тоа беше неоспорно попречување“.
Од Кремљ и Европската комисија се побарани коментари. Бугарската управа за контрола на воздушниот сообраќај го потврди инцидентот во изјава за „Фајненшл тајмс“.
„Од февруари 2022 година, има значително зголемување на попречувањето на GPS сигналите, а во последно време и на лажирање на сигналите“, се наведува во соопштението. „Овие пречки се мешаат во точниот прием на GPS сигналите, што доведува до разни оперативни предизвици за авионите и копнените системи.“
Таканареченото GPS блокирање и лажирање, кое го нарушува или спречува пристапот до сателитскиот навигациски систем, традиционално го користат воените и разузнавачките служби за одбрана на чувствителни локации, но сè повеќе го користат земји како Русија како средство за нарушување на цивилниот живот.
Владите на Европската Унија предупредија дека растечкото GPS блокирање, за кое се обвинува Русија, може да доведе до голема воздушна катастрофа, заслепувајќи ги комерцијалните авиони во лет.
Инцидентите на GPS блокирање значително се зголемија во Балтичкото Море и источноевропските држави во близина на Русија во последниве години, што влијае на авионите, бродовите и цивилите кои ја користат услугата за секојдневна навигација.
Фон дер Лајен долета од Варшава до бугарскиот град за да се сретне со премиерот Росен Жељазков и да посети фабрика за муниција. Претседателот на комисијата беше на турнеја низ земјите од ЕУ на првата линија за да разговара за напорите за подобрување на одбранбената подготвеност на блокот како одговор на војната на Русија против Украина.
„Рускиот претседател Владимир Путин не се променил и нема да се промени“, изјави фон дер Лајен пред новинарите за време на нејзиниот престој во Бугарија во неделата. „Тој е предатор. Може да се држи под контрола само со силно одвраќање.“
Бугарија беше еден од најважните европски добавувачи на воена опрема за Украина, прво оружје од советската ера во првите месеци од војната, а сега артилерија и други производи произведени од големата одбранбена индустрија на земјата.
По посетата, фон дер Лајен го напушти Пловдив со истиот авион без инциденти, пренесува дневник.хр.
