Денешната седница на Советот на јавните обвинители, на кој требаше да се донесе одлука за именување на вршител на должноста државен јавен обвинител, се одложи поради отсуство на еден од членовите. Бидејќи ова прашање беше единствено предвидено на Дневниот ред, седницата е поместена и ќе се одржи во понеделник од 11 часот.

Причина за потребата од ваква одлука е повлекувањето на досегашниот државен јавен обвинител, Љупчо Коцевски, кој поднесе неотповиклива оставка.

Законот за Јавното обвинителство предвидува дека функцијата вршител на должност државен јавен обвинител може да ја извршува обвинител од редовите на Јавното обвинителство на Република Македонија. Мандатот на ваквиот избор е времен и трае до назначување нов државен јавен обвинител, но најмногу шест месеци.

Инаку, законодавниот дом сè уште не ја активирал процедурата за избор на нов носител на оваа функција.

Коцевски ја објави својата оставка пред почетокот на седницата во Собранието, на која требаше да се расправа за негово разрешување од функцијата, образложувајќи дека се повлекува поради континуирани политички притисоци и недостаток од поддршка за работата на обвинителството.