Во угостителски објект во Гостивар синоќа е лишен од слобода вработен во Основниот суд – Гостивар А.Ј.(49) од село Присојница, општина Маврово и Ростуше,  поради сомнение за сторено кривично дело „примање поткуп“ по член 357 од Кривичниот законик.

Како што соопшти МВР, според пријавеното од Н.А. од село Калиште, општина Врапчиште, А.Ј. – вработен во Основен суд Гостивар, го контактирал неговиот пријател С.М. од Гостивар и му понудил за сума од 100 евра да избрише судска казна од 200 евра и забрана за управување со возило од шест месеци, тврдејќи дека документите пристигнале кај него за извршување и дека може да му заврши работа.

-Н.А. во име на неговиот другар го побарал А.Ј. и договориле средба во угостителски објект во Гостивар, а откако се сретнале го информирал дека е новинар и дека снима, по што А.Ј. се обидел да се оправда дека се шегува и се обидел да побегне. А.Ј. е задржан во полициска станица и по целосно расчистување и документирање на случајот, против него ќе биде поднесена соодветна пријава, соопшти МВР.