Штипјанецот Зоран Николов, член на кочанскиот планинарски спортски клуб Осогово, се искачи на највисокиот врв на европскиот континент, врвот Елбрус на планината Кавказ во Русија со 5.642 метри надморска височина.

• Со голема гордост и радост, ПСК Осогово упатува искрени честитки до нашиот член Зоран Николов за успешно искачениот врв Елбрус (5.642 м) – највисокиот врв на Европа. Овој значаен подвиг е резултат на огромна истрајност, љубов кон планината и силен планинарски дух, со кој Зоран уште еднаш го претстави нашиот клуб на највисоко ниво. Нека ова искачување биде инспирација за сите сегашни и идни планинари, а на Зоран му посакуваме уште многу нови успеси и безбедни искачувања на идните врвови!, вели претседателот на ПСК Осогово, Тошо Антов.

Инаку, долго во Европа за највисок врв беше третиран врвот Мон Блан на француско-италијанската граница, кој е висок 4.808 метри, а ваквиот тренд беше наметнат политички, поради тоа што Елбрус се наоѓа во тогашниот СССР, главниот ривал на Западниот свет.