Драматични снимки од безбедносните камери ги забележаа последните моменти од брачната двојка убиена во терористички напад на плажата Бонди во Сиднеј. Борис Гурман (69) и неговата сопруга Софија (61) беа меѓу првите што се соочија со напаѓачот, обидувајќи се да му го земат оружјето и да ги заштитат другите луѓе. Во тој обид, двајцата беа убиени, а според сведоштвата, тие загинаа прегрнувајќи се еден со друг, пишува Би-Би-Си.
Видеото покажува како Борис, пензиониран механичар, се бори со еден од терористите и успева да му го одземе оружјето, по што двајцата паѓаат на земја. Потоа Борис станува и се чини дека се обидува да се одбрани користејќи го пиштолот како палка. Се верува дека напаѓачот потоа дошол до друго оружје, кое го користел за да ги убие Борис и Софија.
Видеото може д го видите н линкот.
Семејството Гурман изјави дека иако болката од нивната загуба не може да се намали, тие чувствуваат огромна гордост за нивната храброст и несебичност.
„Тоа беше суштината на Борис и Софија – луѓе кои инстинктивно се обидуваа да им помогнат на другите“, изјавија тие. Двојката беше во брак 34 години и требаше да ја прослави својата 35-годишнина во јануари. Како долгогодишни жители на Бонди, тие се опишани како вредни, топли и посветени на своето семејство, на кои им е оставена огромна празнина со нивното заминување.
Сведоците на нападот го нарекуваат Борис Гурман херој. Сопственичката на видеото рече дека тој не се обидел да избега, туку трчал директно кон опасноста, борејќи се до последен момент. „Гледањето како е удрен и паѓа беше срцекршачки момент“, рече таа, додека други сведоци инсистираа дека јавноста треба да знае што се обидел да направи.
