Организирањето настапи на странски музички изведувачи и други креативци од областа на културата во угостителски објекти во Северна Македонија подразбира строго дефинирана постапка и навремено обезбедување на соодветни согласности од надлежните институции.
Процесот се состои од две задолжителни фази – прво пред Министерство за економија и труд, а потоа и пред Агенција за вработување на Република Северна Македонија.
Фаза 1: Постапка пред Министерството за економија и труд
Првата фаза започнува со поднесување барање за добивање согласност за давање креативни услуги од областа на културата во угостителски објект. Барањето се поднесува во архива на Министерството, најдоцна 7 работни дена пред планираниот настан.
Кон барањето задолжително се доставуваат следниве документи:
- Тековна состојба од Централен регистар на Република Северна Македонија, не постара од 3 месеци
- Детален план и програма на активностите што ќе ги реализираат странските изведувачи (вклучувајќи листа на песни и наведување на сите членови на групата, а не само главниот изведувач)
- Лиценца или важечка категоризација за работа на угостителскиот објект
- Покана за учество или договор со организаторот или клиентот на услугата
- Кратка биографија за секој од странските изведувачи (задолжително за сите членови)
- Листа на претходно реализирани активности на територијата на Република Македонија, со наведување на сите учесници
- Копија од патна исправа за секој од странските изведувачи
По разгледување на документацијата, Министерството за економија и труд издава согласност, со што се создава основ за продолжување кон втората фаза од постапката.
Фаза 2: Постапка пред Агенцијата за вработување
По добивањето на согласност од Министерството, се пристапува кон втората фаза – поднесување барање до Агенцијата за вработување за издавање потврда за пријава.
Во прилог на барањето се доставуваат:
- Тековна состојба од Централен регистар на РСМ, не постара од 3 месеци
- Покана за учество или договор со организаторот или клиентот
- Термински план и програма на активностите (со наведување на сите членови)
- Оригиналната согласност издадена од Министерството за економија и труд
- Кратка биографија за секој член од групата
- Копија од патна исправа за сите странци
- Копија од барањето доставено до Министерството за економија и труд
- Список на странци со информации за нивниот престој (хотел или друго сместување)
По комплетирање на постапката, Агенцијата за вработување издава потврда за пријава, која претставува валиден документ и задолжителен доказ при евентуален инспекциски надзор.
Важна напомена
Надлежните институции особено нагласуваат дека во целокупната документација мора да бидат опфатени сите членови на групата, без исклучок, бидејќи непотполна документација може да доведе до одбивање на барањето или одложување на настанот.
Со навремено и коректно поднесување на барањата, организаторите обезбедуваат законско и непречено одржување на културните настани во угостителските објекти.
