Вработените во Македонска Пошта во цела држава денеска ја прекинаа работата во знак на протест поради тоа што не им е исплатена платата. Протестите ќе траат и натаму, или како што кажа Сашо Димитриески, претседател на Синдикатот во Македонски пошти додека не добијат плата. Раководството ќе го информираат дека доколку следната плата не биде исплатена до 15 јануари, веднаш ќе се започне со протест, а не е исклучен и штрајк на сите вработени.

 -Три, четири месеци доцни платата. Вработените се крајно револтирани и затоа што 60% од нив земаат минимална плата, и таа плата не ја земаат редовно. 1.700 вработени чекаат плата. Од нив 300 поштари на кои не им е регулиран статусот,  изјави Димитриески.

На протестот беше и претседателот на ССМ, Слободан Трендафилов кој кажа дека „нема работа без плата и дека луѓе блиски до раководството на Пошта им се заканувале на вработените да не излегуваат на протест“.

Платата не е единствената причина за протестот. Поштарите се пожалија на работните услови –  работат без без греење, во зграда со покрив со азбест и без други основни услови за работа.