Тридневна програма организираат Општина Кочани, заедно со Организацискиот одбор составен од Здружението на граѓани „16 Март“, ОО на Црвен крст – Кочани, Црковниот храм „Св. великомаченик Георгиј“, ЈЗУ ОБ Кочани, советници и НУЦК „Бели мугри“, со која сакаат да им се оддаде почит на загинатите во трагедијата во Пулс.

Програмските активности се распоредени во три дена – 14, 15 и 16 март.

На 14 март ќе се одржат православни содржини посветени на упокоените во несреќата – молитвено сеќавање и духовно единство во нивна чест.

Настанот на 15 март е насловен како „Кочани Ви благодари“. Овој ден ќе биде посветен на повредените и на благодарноста кон сите институции, здравствени установи, здруженија, поединци и сите, сите оние што помогнаа младите да преживеат и да закрепнат. Од страна на општината се упатени официјални покани до здравствените установи кои беа огромна поддршка по несреќата, а од општината ги повикаа и повредените деца кои и денес имаат контакт со болниците во кои беа лекувани – самите да ги поканат своите доктори и медицинските крепители.

„Општина Кочани е овде и ќе ги удостои со топол и срдечен прием, ќе им обезбеди сместување и сите потребни почести“, вели градоначалникот Владко Грозданов.

„Планираме поканетите делегации од институциите и здруженијата што дадоа свој придонес да ги одликуваме со статуетки на благодарност, по што настанот ќе продолжи со пригодна културно-уметничка програма – како израз на живот, надеж и заедништво.“ – додава тој.

Содржините на 16 март ќе бидат посветени на достоинствено оддавање почит на починатите во трагедијата во дискотеката „Пулс“. Младите што трагично ги загуби Кочани и Македонија, велат од Општина Кочани, ја заслужуваат почитта кон нив да ја искажеме мирно, достоинствено и сплотено – како што доликува на заедница што памети и што се грижи.

Деталите од програмата дополнително и поединечно ќе бидат соопштени.