Словенечкиот премиер, Јанез Јанша, го покани американскиот претседател Доналд Трамп да ја посети Словенија, а Трамп ветил дека ќе ја прифати поканата, соопшти словенечката Влада во објава преку платформата „Икс“.

Јанша, кој од мај по четврти пат е премиер на Словенија, во разговор за конзервативната американска телевизија „Њузмакс“ изјави дека Трамп му ветил дека ќе дојде во Словенија.

Информацијата за поканата до републиканецот Јанша ја објави и на својот профил на „Икс“, придружувајќи ја со краток исечок од разговорот.

Тој во објавата нагласи дека Словенија и САД имаат посебни односи.

„И токму поради тоа, синоќа на приемот го поканив претседателот Доналд Трамп во Словенија“, порача претседателот на Владата на Словенија, државата што е татковина на Меланија, сопругата на Трамп.

Двајцата лидери во вторникот се сретнаа на традиционалниот прием за лидерите што на маргините на Генералното собрание на ОН го приреди претседателот на САД.