Церемонијата ќе се одржи во Музејот на византиската култура во Солун

Останките потоа ќе бидат пренесени во Софија со авион

Предвидено е погребување во црквата „Света Софија“

Бугарија и Грција постигнаа договор за испраќање на посмртните останки на цар Самуил во Бугарија, а официјалната церемонија е закажана за 3 октомври во Музејот на византиската култура во Солун.

Договорот, според најавата од бугарските власти, предвидува реципрочен трансфер за складирање на историски, религиозни и културни артефакти и реликвии.

Бугарскиот премиер Румен Радев изјави дека договорот е резултат на интензивни преговори меѓу двете земји. Според него, бугарската држава со децении настојува да ги врати посмртните останки на Самуил во Бугарија.

Барањето на Софија за нивно враќање не е ново. Тоа повеќепати било разгледувано меѓу двете земји во изминатите децении, но без да се стигне до конечно решение. Прашањето повторно било поставено во 2022 година, за време на кабинетот на Кирил Петков. Тоа беше период во кој Атина и Софија развија особено тесна соработка, пред сè во областа на енергетиката и меѓусистемските врски, во услови на енергетската криза што следеше по војната во Украина.

Во рамките на овие контакти, Петков повторно го поставил и прашањето за останките на цар Самуил, во обид Софија да дојде до телото на големиот средновековен цар.

Случајот, сепак, бил далеку од едноставен. Со години меѓу двете држави стојат нерешени низа прашања поврзани со враќањето на црковни богатства, ракописи и реликвии, одземени од манастири во Северна Грција за време на двете светски војни. И сега, за да се реализира пренесувањето на останките на цар Самуил во Бугарија, била потребна и согласноста на Грчката православна црква, пишува naftemporiki.gr.

Останките биле откриени во 1965 година од грчкиот археолог, професор Николаос Муцопулос, при археолошки истражувања во базиликата „Свети Ахил“ на истоимениот остров во Малото Преспанско Езеро.

Со останките на цар Самуил ќе бидат предадени и останките од уште два саркофага пронајдени во истата црква. Според бугарските наводи, се верува дека тие му припаѓаат на царот Гаврил Радомир, син на Самуил, и на други членови на царското семејство.

По транспортот во Софија, останките на цар Самуил треба да бидат поставени во посебен саркофаг во црквата „Света Софија“.

Самуил бил владетел на средновековна држава во периодот до 1014 година, а неговото име и денес има значајно место во историските и националните наративи на Бугарија и Македонија.