Чесната глава се чува во грчки манастир кај Верија

Моштите се изложени за поклонение во Стара Загора до 6 октомври

Настанот повторно го отвора прашањето за наследството на Свети Климент

Според информациите објавени од Религија.мк, чесната глава на Свети Климент е испратена во Стара Загора на празнично чествување на градот, а досега се наоѓала во грчкиот манастир „Св. Јован Крстител“ во близина на Верија, додека најголемиот дел од моштите на Свети Климент Охридски, пак, се чуваат во манастирот „Св. Климент и Пантелејмон“ на Плаошник во Охрид.

Во Бугарија чесната глава пристигна во рамките на црковните чествувања во Старозагорската епархија. Таа беше свечено пречекана од Старозагорскиот митрополит Кипријан, а верниците ќе можат да ѝ се поклонат до 6 октомври.

За 7 октомври е најавено и учество на бугарскиот патријарх Даниил на централното чествување.

Прашањето како главата на Свети Климент завршила во Грција има повеќе толкувања. Според едната верзија, таа била однесена од монаси од Охрид, додека според друга, постои предание дека самиот светител сакал неговата глава да биде вратена на местото каде што бил замонашен.

Овие различни толкувања се наведуваат и во информациите на Старозагорската митрополија.

Настанот се случува во период во кој повторно се отвораат прашањата поврзани со историското наследство на средновековната држава и охридската книжевна и црковна традиција.

Само еден ден порано, во Бугарија пристигнаа и посмртни останки, кои му се препишуваат на цар Самуил, по договорот постигнат меѓу Грција и Бугарија.

Според Религија.мк, временската блискост на двата настани отвора прашање дали станува збор за совпаѓање на црковни и историски чествувања или за поширок интерес кон симболите поврзани со средновековното наследство на Охридската Архиепископија.

Извори: Религија.мк, БГНЕС и Старозагорска митрополија