- Воведување нов систем и стандард (ISO 20022): Овој викенд (7 и 8 ноември 2026) се спроведува премин кон нов систем за домашен платен промет и стандардот ISO 20022, поради што се воведуваат нови платни налози и нови алфанумерички шифри за целта на плаќањето (на пр. SALA, ELEC, RENT).
- Нов IBAN формат без отворање нови сметки: Постојните денарски сметки на граѓаните добиваат меѓународно стандардизиран IBAN формат со додавање на ознаката „MK07“ пред постојниот број, додека конверзијата во електронското и мобилното банкарство ќе се врши автоматски.
- Привремени ограничувања и мерки за викендот: Банките најавија привремени прекини и затворени експозитури во сабота (како кај Халкбанк), па затоа се препорачува предвидените плаќања да се завршат пред викендот, а граѓаните треба да проверат и дали им се активни претходно зачуваните налози со идни датуми.
Како што објавија деловните банки и Македонската банкарска асоцијација промената е поврзана со воведувањето на меѓународниот стандард ISO 20022, новиот формат на денарските платежни сметки (IBAN) и новите платни налози. За граѓаните ова значи неколку практични промени, но и привремени ограничувања во користењето на банкарските услуги.
Од Македонската банкарска асоцијација најавуваат дека за време на спроведувањето на техничките активности, се можни привремени прекини или ограничена достапност на одредени услуги во банките, посебно во платежните трансакции. Привремената недостапност ќе биде поврзана со овие однапред планирани системски прилагодувања.
Точните термини на активностите, услугите што ќе бидат опфатени и очекуваното времетраење на ограничувањата ќе бидат наведени во поединечните известувања на банките до своите клиенти.
Слушајте радио во живо
Што конкретно ќе се промени за физичките лица?
Денарските сметки добиваат нов IBAN формат. Ова е една од највидливите промени.
- Постојниот број на денарската сметка останува непроменет.
- Пред постојниот број ќе се додаде ознаката MK07.
- Новиот формат ќе се користи за домашните денарски трансакции.
- Девизните сметки го задржуваат досегашниот IBAN.
Тоа значи дека граѓаните нема да добијат нова сметка, туку постојната ќе добие нов меѓународно стандардизиран формат. Според банките, кај електронското и мобилното банкарство конверзијата ќе се врши автоматски.
Прочитајте и за ова:
Нови платни налози
Досегашните обрасци ПП10, ПП30, ПП40, ПП50 и ПП53 се заменуваат со нови стандардизирани обрасци. Тоа значи нови обрасци за уплата и повлекување готовина, за плаќање сметки и префрлање пари и за плаќање јавни давачки и обврски кон буџетот. Граѓаните кои плаќаат на шалтер ќе треба да ги користат новите обрасци. Тие ќе бидат достапни во банките.
Нови шифри за целта на плаќањето
Досегашните нумерички шифри се заменуваат со четиризнаковни алфанумерички ознаки.На пример:
- SALA – плата;
- ELEC – електрична енергија;
- RENT – наемнина.
Важно е дека шифрата за целта на плаќањето не е задолжителен податок за прием и извршување на налогот. Доколку не ја внесете, банката може да ја определи соодветната шифра или да го проследи налогот без неа.
Прочитајте уште и за ова:
Кривична истрага за унгарскиот кредит за Македонија
Дали граѓаните треба нешто да преземат?
Според досегашните известувања на банките не треба да отвораат нови сметки, да менуваат платежни картички или да бараат нови броеви на сметки.
Сепак, има неколку работи на кои треба да обрнат внимание:
- Ако имаат планирани плаќања, подобро е да ги реализираат пред викендот.
- Ако плаќаат на шалтер, од понеделник ќе треба да ги користат новите обрасци.
- Ако примаат плата или пензија, бројот на сметката не се менува.
- Ако имаат зачувани платни налози за идни датуми, треба да проверат дали ќе останат активни по промената. НЛБ, на пример, предупредува дека одредени непотпишани налози со датум по 9 ноември нема да можат да се искористат.
