- Домашните посетители плаќаат 120, а странските 240 денари, според цените што ги наведе.
- Таа тврди дека наплатата е за пакет услуги, а не за класичен влез на локалитетот.
- Предложила цена од пет евра по лице, без разлика дали посетителите се од Македонија или од странство.
Стојна Димитровска-Бот во емисијата изјави дека нема намера да се откаже од наплатата, која ја оправдува со користењето приватно земјиште и услугите што им се нудат на туристите. Таа тврди дека постапува законски, но во гостувањето не презентираше документ со кој би го поткрепила тоа.
Слушнете го Канал 77 радио во живо онлајн!
Наплата за паркирање, информации и користење приватен имот
Димитровска-Бот објасни дека не станува збор за класични влезници за Камените Кукли, туку за пакет услуги што опфаќа туристички информации, паркирање и користење приватно земјиште. Според неа, цената е иста без разлика дали посетителот ќе искористи една или повеќе од понудените услуги.
Водителот Кристијан Ландов ја праша што се случува со посетителите кои пристигнуваат пеш и сакаат само да стигнат до државната патека, без да користат паркинг или туристичко водење.
Димитровска-Бот одговори дека до патеката се стигнува преку приватна парцела. Посочи дека дел од земјиштето е семејно, а за други парцели здружението има договори за користење со сопствениците.
„Сум наплаќала, наплаќам и ќе наплаќам“, порача таа во емисијата.
Предлог за единствена цена од пет евра
Во разговорот откри и дека до здружението „Извор Кратово“ доставила предлог за воведување единствена цена од пет евра по лице, без разлика дали станува збор за домашни или странски туристи. Предлогот сè уште треба да биде прифатен.
Ландов ја соочи и со наводите од допис на Општина Кратово за неовластено користење на просторот и нелегална наплата. Димитровска-Бот ги отфрли обвинувањата, повторувајќи дека настапува како давател на услуги, а не како лице кое продава влезници.
Во емисијата беше отворено и прашањето за судскиот спор околу предавањето недвижен имот во владение на Музејот во Кратово. Притоа беше нагласено дека презентираната пресуда не е правосилна.
Прашањето дали посетителите можат да стигнат до Камените Кукли без да платат, како и каде завршува јавниот локалитет, а почнува приватниот имот, останува во центарот на спорот околу наплатата.
Целото гостување на Стојна Димитровска-Бот е објавено во емисијата „Претрес со Ландов“.
Слушајте го Канал 77 радио во живо КЛИКНЕТЕ ТУКА
(К.М.)
