Сопствениците на кучиња во Европа се повикуваат да ги вакцинираат своите кучиња против беснило по неодамнешното повторно појавување на болеста, која е фатална за луѓето ако ги касне заразено животно, објави во вторник германската новинска агенција ДПА.
Истражувачите од француската агенција за здравствен надзор АНСЕС открија два вида на вирусот на беснило кои се шират во земји меѓу кои се Украина, Унгарија и Словачка.
Иако болеста е во голема мера искоренета во Европа, беснилото почна повторно да се појавува во Полска во 2021 година, според АНСЕС.
Над 100 случаи на инфекција се идентификувани во Романија во 2025 година.
Враќањето на беснилото веројатно е поттикнато од падот на вакцинациите во Украина по руската инвазија на почетокот на 2022 година.
„Враќањето на беснилото во Европа ги покажува ефектите од вооружениот конфликт врз здравјето и дивиот свет“, рече Емануел Робарде од АНСЕС, чиј тим соработуваше со националните ветеринарни власти во Унгарија, Полска, Молдавија, Словачка и Украина за да го спроведе истражувањето објавено во списанието Emerging Infectious Diseases.
Минатата година, еден маж почина во Романија откако се заразил со беснило, што беше прв таков смртен случај во Европа од 2012 година.
Европскиот центар за превенција и контрола на болести (ЕЦДЦ) во својот последен извештај за беснило од октомври 2025 година објави дека еден маж во Франција, исто така, починал еден ден откако му е дијагностицирано беснило, односно една недела откако е хоспитализиран.
„Вкупниот ризик од инфекција со беснило за жителите и посетителите во Франција во моментов се смета за многу низок“, соопшти ЕЦДЦ во тоа време.
Иако симптомите на беснило во доцната фаза, како што се агресија и лигавење кај кучињата, се јасни, заразените миленици прво може да покажат помалку очигледни знаци како што се немир или намален интерес за нормални активности.
Лилјаците се друго животно кое пренесува беснило и треба да се сметаат за опасни, особено ако се обидат да се сместат во близина или внатре во куќите и во исто време изгледаат подостапни од вообичаеното, што исто така може да биде знак на наезда, пренесува дневник.хр.
