Во нацрт-извештајот за напредокот на Македонија, Томас Вајц повикува на забрзани реформи, уставни измени и поголема поддршка од ЕУ за европската интеграција.

„За европската интеграција на земјата, особено во контекст на новата геополитичка реалност, од суштинско значење е сите политички актери, пред сè владата, да покажат опипливи резултати во клучните области на реформи. Во исто време, ЕУ и нејзините земји-членки мора целосно да ги исполнат своите обврски и, преку активен дипломатски ангажман, да ја поддржат земјата во спроведувањето на нејзините реформски приоритети.“

Ова го изјави известувачот на Европскиот парламент за Северна Македонија и европратеник Томас Вајц, во годишниот нацрт-извештај за напредокот на Северна Македонија, кој ќе го презентира пред Комитетот за надворешни работи на ЕП (АФЕТ) на 26 февруари.

Вајц истакна дека документот дава избалансирана и објективна проценка на напредокот во процесот на пристапување и се подготвува како одговор на пакетот за проширување на Европската комисија за 2025 година.

Австрискиот европратеник истакнува дека Македонија е во тешка позиција, бидејќи процесот на пристапување е практично во застој. И покрај позитивните чекори, напредокот во области како што се владеењето на правото, судските реформи и борбата против корупцијата е недоволен.

Во извештајот се наведува дека не е постигнат напредок во однос на уставните измени, делумно „поради загриженост за нови билатерални блокади или дополнителни барања од Бугарија“. Вајц повикува на итно зголемување на политичката волја од двете страни за надминување на застојот.

Вајц истакнува дека реформите за владеење на правото се од суштинско значење не само за пристапувањето во ЕУ, туку и за создавање просперитетна, одржлива земја со сигурна инвестициска клима. Ова, исто така, ќе овозможи поголеми придобивки од постепените процеси на интеграција и европските проекти.

Вајц нагласува дека ЕУ мора активно да ја поддржи Северна Македонија, вклучително и преку дипломатски напори за надминување на пречките. Тој се залага за стабилно, проевропско и повеќе ориентирано кон проширување мнозинство во поддршка на процесот на пристапување.

Во нацрт-документот се забележува потребата од поголема слобода на медиумите, борба против дезинформациите и посилно учество на граѓанското општество во реформите. Првите чекори во реформската агенда се добредојдени, но се нагласува потребата од понатамошни напори, особено за зајакнување на пазарот на трудот.

Постигнат е напредок во Законот за енергетика и во развојот на Коридорите 8 и 10. Потребни се нови инвестиции во инфраструктурата и хармонизација на законодавството за животна средина, се наведува и во извештајот.