Во Штип викендов ќе се одржи третото издание на модната манифестација „Shtip Fashion Days“, која полека се позиционира како еден од позначајните настани од ваков тип во источниот дел на земјата. Според најавите од локалната самоуправа, програмата е закажана за 17 и 18 април, а ревиите ќе се реализираат во Трговскиот центар во центарот на градот.

Годинава публиката ќе има можност да проследи осум модни ревии, зад кои стојат познати штипски текстилни компании:

„На настанот ќе бидат претставени осум ревии, кои што ќе бидат создадени од страна на поголемите штипски компании, а се разбира оваа година поддржуваме и доста голем број млади дизајнери, кои ќе имаат можност да ги претстават моделите пред пошироката јавност. Она што е ново оваа година е тоа што настанот ќе биде отворен со ревија на 15 студенти, кои студираат на приватните и државните универзитети во државата“, вели секретарката на Општина Штип, Вишна Шорова-Ангелова. 

Организаторите најавуваат дека најуспешниот студент ќе добие можност да настапи со целосна колекција на следното, есенско издание на „Shtip Fashion Days“, што претставува дополнителен поттик за младите таленти.

Минатогодишното издание, пак, привлече значително внимание кај јавноста и беше проследено со солидна посетеност. Дел од ревиите се одржаа на отворено, со модерна сценографија, светлосни ефекти и музичка програма во живо, што му даде поинаква динамика на настанот. Учествуваа повеќе домашни брендови, а интересот беше зголемен и од страна на гости од други градови, особено млади љубители на модата. Дополнително, лани беа организирани и неформални средби меѓу дизајнерите и публиката, што овозможи директна комуникација и размена на идеи.

Со ваквиот континуитет и проширување на програмата, од општината очекуваат и годинава настанот да донесе голема посетеност и да придонесе за афирмација на текстилна индустрија, по која Штип е препознатлив.