Британскиот Форин офис ја назначи Маја Сивагнанам за нов амбасадор во Македонија, наследувајќи го Метју Лосон, кој на оваа функција е од 2022 година. Со тоа, Обединетото Кралство ја има својата втора амбасадорка, по Рејчел Галовеј во нашата земја. Како што е најавено, новата амбасадорка Сивагнанам ќе ја преземе својата должност во текот на август 2026 година.
Маја Сивагнанам е професионален дипломат со 25-годишно искуство. Иако работела на неколку дипломатски позиции, ова е нејзина прва служба како највисок дипломатски претставник во една земја.
Во својата биографија, новата британска амбасадорка во Македонија наведува дека работела во Британската амбасада во Анкара, Турција, а била и заменик-директор на Самитот на Европската политичка заедница, кој се одржа лани во Лондон. Сиванганам била и заменик-директор, Оддел за регион на Јужна Азија, раководител на оддел за Северна Европа, прв секретар на Постојаното претставништво на Обединетото Кралство во ЕУ.
