Американските танкер – авиони да можат да го користат софискиот аеродром во замена за безвизен режим за граѓаните на Бугарија. Ова е барањето што новиот бугарски премиер Румен Радев го упатил до американскиот претседател Доналд Трамп и до американскиот секретар за војна Пит Хегсет во текот на вчерашниот телефонски разговор.
„Во мојот разговор со американскиот претседател, инсистирав да го покренам прашањето за укинување на американските визи за бугарските граѓани и очекувам ова прашање итно да се разгледа“, рече Радев пред состанокот со владиниот кабинет.
Радев информира дека е договорено американските воени авиони да останат на аеродромот во Софија „Васил Левски“ во рамките на стратешкото партнерство меѓу Бугарија и САД.
Владата на Росен Жељазков во февруари годинава одобри привремен престој на до 15 авиони танкери KC-135 и 500 луѓе – американски персонал. Темата предизвика широк јавен и политички интерес. Официјално, авионите учествуваат во активностите на НАТО за „засилена будност“ и логистичка поддршка за сојузничките операции.
„На аеродромот „Васил Левски“ во Софија се стационирани авиони-танкери на воздухопловните сили на САД – наш стратешки партнер и сојузник. Тие пристигнуваа таму со одлука на Кабинетот на министри на кабинетот на Жељазков со период на престој до крајот на мај. Очекувам американската страна да побара продолжување на нивниот престој на аеродромот во Софија“, рече Радев.
Новиот премиер додаде дека паралелно со темата за воена соработка, во неговите разговори со Доналд Трамп го покренува и покренато долгогодишното прашање за укинување на визите за бугарските граѓани, што е меѓу клучните приоритети на надворешната политика на Софија.
Евентуалното воведување на безвизен режим на Бугарија со САД би отворило можност и за македонските државјани, кои имаат бугарски пасош. Од јануари годинава Македонија се најде на листата земји чии државјани добија привремена забрана за издавање на имигрантски визи. Американскиот Стејт департман соопшти дека од 21 јануари ќе ја суспендира обработката на имигрантски визи за државјани од 75 земји, вклучително и Македонија.
Објавувањето на овој список на земји од американската власт беше објаснето со честите случаи на злоупотреба на имигрантскиот статус, поради што до завршување на проверките, визи нема да се издаваат.
