Невообичаен случај решаваше грчката полиција во соработка со Интерпол, откако добила повик за помош за 79-годишна државјанка на Шведска, која 40 дена била држана во заробеништво.
Се’ почнало од социјалната мрежа Фејсбук, каде триесетгодишен маж од Грција ја запознал Швеѓанката и онлајн ѝ „продал“ љубов, а потоа, откако дошла во Грција, ја држел заклучена во својата куќа околу 40 дена.
Во тој период, тој ги земал сите пари што ги имала со неа и систематски ја злоставувал. Случајот беше откриен во среда попладне по тревога од Интерпол и координирани акции од страна на грчките власти.
Според информациите, жената се обидела да се јави на 112, но мажот којшто ја држел затворена, ја забележал и го скршил телефонот. Потоа жената некако успеала да испрати порака до роднина, кој ги известил шведските власти, а потоа Интерпол ја известил грчката полиција.
Полицијата во Ксанти извршила претрес во домот на 30-годишникот и ја пронашла жената заклучена внатре. Жената била во лоша состојба. Таа била однесена кај судски лекар, каде што биле утврдени модринки, контузии и гребнатини.
Жената од Шведска сега се лекува на Клиниката за интерна медицина во болницата Ксанти и се очекува да се врати во Шведска, додека 30-годишникот ќе сведочи пред истражниот судија во понеделник.
