Неосновани теории на заговор за убиството на конзервативниот активист Чарли Кирк експлодираа на социјалните медиуми во текот на неделата по пукањето, а поддржувачите и од левицата и од десницата ги ширеа со вртоглава брзина, велат експертите.
Според PeakMetrics, независна аналитичка фирма, на мрежата X имало повеќе од два милиони уникатни објави поврзани со теории на заговор за убиството на Кирк. Тоа е приближно двојно повеќе од бројот на објави по обидот за атентат врз Доналд Трамп минатата година во Пенсилванија, според CNN.
Ваквата лавина од непроверени тврдења стана вообичаена по секој шокантен настан или масовно пукање. Но, овој пат, видеото од смртта на Кирк веднаш стана вирално, со јасни политички импликации – Кирк го водеше младинското движење MAGA и беше честа цел на либералите, како и на десничарските групи.
Сојузниците на Трамп, како што е Стив Банон, ја изнесоа идејата дека Кирк бил убиен како дел од поширок национален заговор, иако истражителите рекоа дека веруваат оти осомничениот, Тајлер Робинсон, дејствувал сам. Либералните коментатори тврдеа дека Робинсон бил подесно од Кирк во политичкиот спектар, и покрај растечките докази дека не му се допаѓаат конзервативните ставови на Кирк.
Други, потпирајќи се на антисемитски стереотипи, тврдеа дека израелските шпиони го убиле Кирк затоа што почнал да отстапува од својата долгогодишна поддршка за Израел. Различни аполитички теории, исто така, циркулираа вирално, вклучувајќи ја и онаа за наводно сомнителен дрон што летал над митингот на Кирк, како и камери во близина кои наводно биле отстранети по настанот.
„Ова е најлошото нешто што сум го видел“, рече Брет Шафер од Алијансата за обезбедување демократија, непрофитна организација што ги следи дезинформациите. „И двата табора се вклучија во неодговорно, па дури и срамно однесување“.
Теории од левицата
Левицата тврдеше дека Трамп го оркестрирал убиството на Кирк за да го одвлече вниманието на јавноста од скандалот со Џефри Епштајн. Други ширеа приказни за наводни беспилотни летала над неговиот митинг.
Многумина шпекулираа дека осомничениот, Тајлер Робинсон, припаѓал на крајната десница и бил против Кирк затоа што „не бил доволно радикален“. Историчарката Хедер Кокс Ричардсон напишала дека Робинсон „го мразел Кирк затоа што не бил доволно екстремен“, но подоцна признала дека тоа не е цврсто потврдено.
Во меѓувреме, обвинителството откри дека мајката на Робинсон ѝ рекла на полицијата дека нејзиниот син „се наклонил повеќе кон лево во изминатата година“ и дека тој ѝ признал на својата партнерка, која е трансродова, дека го застрелал Кирк затоа што „му е доста од неговиот говор на омраза“.
Теории од десно
Веднаш имаше тврдења од десницата дека напаѓачот бил „демократ“, „трансродов“ или поврзан со Антифа. Водителот Џими Кимел ги критикуваше овие обвинувања, по што неговата емисија беше повлечена од програмата.
Некои сојузници на Трамп тврдеа дека Робинсон бил дел од „терористичка ќелија“ или „жртвено јагне“, додека владата наводно прикривала мрежа на заговор.
Директорот на ФБИ, Кеш Пател, дополнително ги разгоре сомнежите со предвремено објавување неточни информации за апсењето, кои теоретичарите на заговор ги искористија како „доказ за прикривање“.
Антисемитски теории
Најшироко прифатената теорија, велат експертите, е дека Израел го убил Кирк затоа што наводно почнал да ги менува ставовите за државата за време на војната во Газа.
Нема докази за ова, а израелските лидери, вклучувајќи го и премиерот Бенјамин Нетанјаху, јавно ги осудија обвинувањата, нарекувајќи ги „луди“ и антисемитски.
PeakMetrics известува дека оваа теорија имала повеќе од 1,3 милиони објави на Xu – убедливо најмногу од сите. Меѓу оние што ја шират се Алекс Џонс и Кендис Овенс, како и некои маргинални новинари.
Иран, исто така, ја прифати оваа теорија и ја пласира силно на интернет, иако, како што вели Шафер, тоа „нема смисла со оглед на тоа што Кирк беше многу произраелски настроен“.
Н1
