Мета планира да тестира нови модели на претплата во наредните месеци што ќе им овозможат на корисниците пристап до ексклузивни функции на Инстаграм, Фејсбук и WhatsApp, потврди компанијата за TechCrunch. Според нив, претплатите ќе донесат повеќе алатки за продуктивност и креативност, како и проширени можности за вештачка интелигенција, пренесува курир.рс.

Мета вели дека нема да ги заклучува апликациите зад „платен ѕид“ – основното користење на Инстаграм, Фејсбук и WhatsApp ќе остане бесплатно. Сепак, корисниците кои сакаат повеќе опции ќе добијат „премиум искуство“ со специјални функции и поголема контрола врз тоа како споделуваат содржина и комуницираат со другите.

Компанијата не оди со еден фиксен пакет. Наместо тоа, планира да тестира различни функции и комбинации на претплати, при што секоја апликација ќе добие свој сет на ексклузивни придобивки.

Еден од клучните делови на оваа стратегија е Манус – агент за вештачка интелигенција неодамна купен од Мета (наводно за околу 2 милијарди долари). Мета има намера да го вклучи Манус во своите планови за претплата, но и да го развие во две насоки: интеграција во апликациите и услугите на Мета и продолжување на продажбата на одделни претплати за деловни корисници.

Веќе има знаци дека Мета работи на додавање кратенка за вештачка интелигенција на Манус на Инстаграм.

Мета исто така ќе тестира претплати поврзани со функциите на вештачката интелигенција, меѓу кои се издвојува Вибес – алатка за генерирање и ремиксирање кратки видеа со вештачка интелигенција во рамките на апликацијата Мета АИ. Иако Вибес беше бесплатен од неговото лансирање минатата година, Мета сега планира пристап со фримиум: основните опции остануваат бесплатни, претплатата отклучува дополнителни функции и повеќе креирање видеа месечно. Со други зборови, корисниците ќе можат да ја испробаат алатката без да плаќаат, но „посилните“ опции ќе се наплаќаат.
Овој потег носи потенцијално големо зголемување на приходите за Мета, но исто така и ризик: сè повеќе корисници се веќе презаситени со претплати. Во свет каде што „секоја апликација плаќа“, Мета ќе треба да понуди доволно силна причина луѓето да издвојат пари за уште една месечна услуга.

Сепак, пазарот очигледно постои. Снап докажа дека моделот функционира – Snapchat+ (од 3,99 долари месечно) надмина 16 милиони претплатници и продолжува да носи приходи за компанијата.

Мета вели дека ќе ги слуша повратните информации од заедницата додека ги воведува и тестира овие нови претплати во текот на наредните месеци.