• Одбраната на Боби Гидиоски предложи 16 материјални докази и осум сведоци.
• Дејан Јованов – Деко е предложен за сведок во врска со наводната имотна корист и контактите со обвинетиот.
• Следното рочиште е закажано за утре во 12 часот.

Во судењето на деветтемина полицајци за „Пулс“, одбраната на обвинетиот Боби Гидиоски побара изведување дополнителни материјални докази и сослушување сведоци, меѓу кои и сопственикот на дискотеката, Дејан Јованов – Деко, кој е прво обвинет во другиот процес за пожарот во дискотеката.

Слушнете го Канал 77 радио во живо онлајн!

Адвокатот Бранко Колев по денешното рочиште изјави дека одбраната предложила 16 документи и осум сведоци. Според него, Јованов треба да биде сослушан за околностите поврзани со наводната имотна корист што, според обвинението, му била овозможена преку постапувањето на обвинетите.

„Го предлагаме на околности затоа што застапникот на обвинението тврди дека обвинетите му дозволиле на Деко да стекне имотна корист која се изразува во плата која ја земал како вработен за шест месеци“, изјави Колев.

Кои документи ги предлага одбраната во случајот „Пулс“?

Според адвокатот, дел од предложените документи се однесуваат на работењето на Министерството за внатрешни работи, односно на СВР Штип. Другите се поврзани со информација за проблемите во дискотеката „Пулс“, за која Колев тврди дека била прикриена од неговиот клиент, Боби Гидиоски, во својство на началник на СВР Штип.

„Дел од документите се однесуваат на работењето на МВР, односно СВР Штип, додека останатиот дел се однесува на проблемска информација која што е прикриена од обвинетиот Боби Гидиовски како началник на СВР Штип, а која проблемска информација е доставена за проблемите во дискотеката „Пулс“ кои ОВР Кочани ги имале во Кочани, меѓутоа таа проблемска информација е прикриена од обвинетиот на кој јас сум бранител“ – изјави Колев.

Овие наводи се дел од аргументите на одбраната, а за предложените докази допрва треба да се произнесе обвинителството и да одлучи судот.

Јавната обвинителка Спасенка Андонова најави дека на следното рочиште ќе се произнесе одделно за секој од доказните предлози на одбраната. Судот одлучи главната расправа да продолжи утре, во 12 часот.

Деветтемина се обвинети за злоупотреба на службената положба и овластување. На претходните рочишта тие се изјасниле дека не се чувствуваат виновни. Обвиненијата и наводите во предметот треба да бидат утврдени во судската постапка.

Процесот продолжува со разгледување на доказните предлози на одбраната, по што судот ќе одлучува за нивното прифаќање и изведување.

Слушајте го Канал 77 радио во живо КЛИКНЕТЕ ТУКА

(Каровски М.)