АЛТА банка оди на продажба: Се нудат 95,3 отсто од акциите, аукцијата на 30 ноември

Народната банка ја објави постапката за продажба на доминантниот акционерски пакет во „АЛТА банка“ АД Битола, кој е во сопственост на „Алта банка“ АД Белград – во стечај. Почетната цена е 3.777 денари по акција.
Граѓани чекаат редици пред банкоматите на Алта банка | Фото: Социјални мрежи
Граѓани чекаат редици пред банкоматите на Алта банка | Фото: Социјални мрежи
  • На продажба се 372.742 обични акции, односно 95,336 отсто од вкупниот број акции.
  • Првата берзанска аукција е закажана за 30 ноември 2026 година, по почетна цена од 3.777 денари за акција.
  • Заинтересираните инвеститори имаат рок до 19 ноември да достават барање до Народната банка за претходна согласност.

Продажбата на АЛТА банка ќе се спроведе преку Македонската берза на хартии од вредност, по моделот „сè или ништо“. Тоа значи дека заинтересираниот купувач ќе мора да го преземе целиот понуден пакет, без можност за купување само на дел од акциите.

Слушнете го Канал 77 радио во живо онлајн!

Шест берзански аукции ако нема купувач на првата

Првата јавна берзанска аукција е закажана за 30 ноември 2026 година, а почетната цена е утврдена на 3.777 денари по акција, врз основа на тековната берзанска цена.

Доколку акциите не бидат продадени на првата аукција, постапката ќе продолжи на 1, 2, 3, 4 и 7 декември. На секоја наредна аукција почетната цена ќе биде намалена за 10 проценти во однос на почетната цена на претходната аукција.

Заинтересираните инвеститори треба најдоцна до 19 ноември 2026 година да достават барање до Народната банка за добивање претходна согласност за стекнување квалификувано учество во Банката. Потребно е да приложат и писмена изјава дека ќе ги уплатат средствата потребни за купување на акциите.

Право на учество на берзанските аукции ќе имаат лицата што ги исполнуваат законските услови.

Целта е обезбедување нов сопственик и стабилно работење

Постапката е дел од активностите на Народната банка за изнаоѓање нов сопственик на „АЛТА банка“ АД Битола и создавање услови за нејзино натамошно стабилно работење.

Одлуката за продажба на доминантниот пакет е насочена и кон зачувување на интересите на штедачите и останатите клиенти на Банката.

Митреска: Народната банка може да ги продаде акциите на АЛТА банка ако не го направи стечајниот управник

Народната банка има законско овластување да ја спроведе продажбата на акциите на АЛТА банка Битола доколку тоа не го направи стечајниот управник на српската Алта банка, која поседува 95,3 отсто од акциите. Ова го појасни вицегувернерката Ана Митреска во Собранието.

АЛТА банка Битола беше тема на надзорна расправа во Собранието, на која вицегувернерката Ана Митреска одговараше на прашања за законската можност Народната банка да ги продаде акциите што ги поседува српската Алта банка, која е во стечај.

Митреска објасни како може да се спроведе продажбата

Митреска посочи дека Народната банка, веднаш по добивањето на јавната информација за одземање на согласноста од Народната банка на Србија за српската Алта банка, донела одлуки со кои ѝ ја повлекла согласноста за располагање со акциите во банката во Битола. Со тоа, српскиот сопственик го изгубил правото на глас.

Сепак, според Законот за банки, тоа не значи автоматско одземање на сопственоста. Предвидена е постапка во која Народната банка му дава рок на акционерот, односно на стечајниот управник, да ги продаде акциите.

„Доколку акциите не се продадат, во тој случај стечајниот управник има должност да ја овласти Народната банка да ја спроведе продажбата, со цел заштита на доверителите и штедачите во македонската банка“, изјавила Митреска.

Таа објаснила дека Законот прецизно ги уредува и начинот и постапката за продажба, вклучително и јавното објавување на информациите и условите за учество на берзанските аукции.

Српската банка е во стечај, а во битолската е воведена администрација

Народната банка на 1 ноември воведе администрација во АЛТА банка Битола, откако Народната банка на Србија на 30 октомври ѝ ја одзеде дозволата за работа на српската Алта банка, нејзин мнозински сопственик. На 3 ноември, Привредниот суд во Белград отвори стечајна постапка над српската банка.

Во меѓувреме, Македонската берза ја стави АЛТА банка Битола на Листата за набљудување.

Народната банка потоа ја објави постапката за продажба на доминантниот акционерски пакет од 372.742 обични акции, односно 95,336 проценти од вкупниот број акции. Првата јавна берзанска аукција е закажана за 30 ноември 2026 година, со почетна цена од 3.777 денари по акција.

Слушајте го Канал 77 радио во живо КЛИКНЕТЕ ТУКА

(Каровски М.)

©Kanal77.мк Крадењето авторски текстови е казниво со закон. Преземањето на авторски содржини (текстови и фотографии) од оваа страница е дозволено само делумно и со ставање хиперлинк до содржината што се цитира. Услови за превземање

Сподели:

Facebook
Twitter
LinkedIn
Email

НАЈЧИТАНИ ВЕСТИ