Гостин во денешното издание на „Стадион“ е Апостол Икономов – Поце, препознатливиот вокал на легендарната македонска група „Меморија“.

Во денешното издание на емисијата, која носи наслов „Оган под ѕвездите“, се разговара за музиката, годините поминати на сцената, песните што оставија трага, но и за новата енергија со која „Меморија“ повторно е присутна пред македонската публика.

Апостол „Поце“ Икономов е еден од вокалите кои го одбележаа најзначајниот период во историјата на „Меморија“. Токму тој го отпеа првиот студиски албум на групата – „Оган под ѕвездите“, објавен во 1990 година. Албумот содржи песни кои со текот на времето станаа дел од препознатливиот музички печат на бендот.

„Меморија“ е основана во 1984 година, а меѓу основачите се гитаристот Душан Трпковски – Ринго и басистот Петар Георгиевски – Камиказа. По почетните години и промените во составот, групата го гради својот препознатлив поп-рок звук, а со „Оган под ѕвездите“ влегува меѓу најзначајните имиња на македонската музичка сцена.

По пауза од речиси три децении, „Меморија“ повторно се активираше, а во 2024 година го објави синглот „За тебе“, со кој најави и нова музичка ера за групата. Во актуелниот состав е и Апостол Икономов на вокал.

Групата во последните години повторно одржува концерти, а на јубилејниот концерт по повод 40 години „Меморија“, одржан во 2024 година, Икономов и Ристо Самарџиев повторно настапија заедно како вокали. Меѓу песните кои добија посебно место беше и „Оган под ѕвездите“, еден од најпрепознатливите наслови поврзани со историјата на бендот.

За музиката што останува, за спомените од едно време и за тоа што значи по повеќе децении повторно да се застане пред публика – со Апостол Икономов во денешното издание на „Стадион“: