Додека ученици биле на екскурзија во Монте Карло, директорка и помошник-директор на училиште наводно се коцкале во казино, тврди СДСМ. Јованче Манасков, претседател на партиската Комисија за образование и наука, обвини дека учениците ги чекале во холот додека нивните придружници играле на слот-машини.
Учениците чекале, раководството било во казино?
Според обвинувањата на Манасков, станува збор за директорката Жанета Сервини и помошник-директорот Љупчо Здравковски од Регионалниот центар за стручно образование и обука „Ѓорѓи Наумов“ во Битола.
Манасков тврди дека за случајот постојат видеоснимки и фотографии, а најави дека материјалите ќе бидат објавени со заматени ликови за да се заштити идентитетот на малолетните ученици.
Се бара одговорност од Министерството
СДСМ ја повика министерката за образование и наука Весна Јаневска да спроведе итен надзор и да утврди дали има основа за одговорност и разрешување на инволвираните лица.
„Одговорноста во образованието не е привилегија, туку обврска“, порача Манасков.
Засега нема објавен одговор од директорката, помошник-директорот или Министерството за образование и наука на изнесените обвинувања. Тврдењата треба да бидат проверени и потврдени од надлежните институции.
(Каровски М.)
