Македонската фудбалска репрезентација од денеска се наоѓа во Глазгов, а утревечер ја очекува дуелот од 5. коло од Лига на нациите Б сегмент, на гостински терен во Шкотска. Селекторот на македонскиот национален тим Гоце Седлоски на прес-конференцијата во пресрет на дуелот истакна:
– Следниот натпревар е голем натпревар, со една силна репрезентација – Шкотска. Пред еден месец во Скопје загубивме од овој ривал. Свесни сме за грешките и мора да ги поправиме. Трениравме во супер атмосфера изминативе три дена. Сакам да видам верба во себе, тактички добро да стоиме и да одиграме натпревар. Резултатите се такви какви што се, свесни сме и ние и играчите, но се надевам дека ќе излеземе од негативната серија во дуелот со Шкотска. Кај противникот се враќа во составот Мектоминеј. Драго ми е што сите репрезентативци добиваат минутажа во клубовите, се надевам дека ќе продолжат и понатаму така, изјави Седлоски.
Натпреварот Шкотска и Македонија се игра на „Хампден парк“ во Глазгов, во петок, со почеток од 20:45 часот. МИА
