Штипјанец вложува во Берово над 10 милиони евра – ќе гради мултифункционален комплекс „Green Gate Berovo“ со апартмани, туризам и старечки дом со капацитет за 200 лица и медицински персонал
Во Берово се најавува изградба на нов голем повеќенаменски комплекс „Green Gate Berovo“, кој ќе опфати станбени апартмани, туристички сместувачки капацитети и старечки дом со организирана здравствена нега.
Станува збор за инвестиција вредна над 10 милиони евра, која ќе се реализира на површина од околу 5.000 м². Проектот е замислен како комбиниран објект кој ќе спои домување, туризам и социјална заштита во една целина, со посебен фокус на грижа за повозрасни лица. Во склоп на овојо комплекс ќе има и аптеки, продавници за храна, спортска опрема, бела техника, текстил, игротека и кафе бар.
Во рамки на старечкиот дом е предвиден капацитет за околу 200 корисници, за кои ќе се грижат медицински тим составен од 20 медицински сестри и 5 доктори, со 24-часовна нега, здравствен надзор и организирани услуги за рехабилитација и социјална поддршка.
Проектот се најавува како еден од поголемите приватни инвестициски зафати во регионот, кој треба да придонесе за развој на Берово како туристичка и здравствено-рекреативна дестинација.
Сопственик на проектот е бизнисменот Горан Јордев од Штип, кој во јавноста е познат како косопственик на ДИК „Фагус“ Пехчево, „Штип Сити Мол“ и „Штип Сити Такси“. Инвестицијата се позиционира како дел од неговото проширување во градежниот и услужниот сектор, при што Берово добива нов значаен развоен проект со комбинација на недвижности, туризам и здравствена грижа.
Отварањето на овој проект е предвидено за почетокот на 2027 година.
