Високи претставници на НАТО го предупредиле украинскиот претседател Володимир Зеленски дека влошувањето на односите со американскиот претседател Доналд Трамп може да ги загрози испораките на американско оружје за Украина, објави „Блумберг“, повикувајќи се на извори во Алијансата.

Загриженоста се однесува на програмата PURL, преку која европските земји во голема мера ги финансираат набавките на американско оружје за Украина.

Според изворите на „Блумберг“, претставници на НАТО стравуваат дека односите меѓу Зеленски и Трамп би можеле да станат непоправливи, со што би се довела во прашање и способноста на Украина да се брани.

Европа се обидува да ги смири тензиите

Претставник на Алијансата изјавил дека Украина била повикана да работи на намалување на тензиите со Вашингтон, предупредувајќи дека непредвидливоста на Трамп може да се одрази врз испораките на оружје.

Европските земји зад сцената се обидуваат да ги подобрат односите со администрацијата на Трамп, наведуваат изворите на „Блумберг“.

Сепак, засега нема планови европски претставници да патуваат во Вашингтон, изјавил друг извор. Такви посети биле организирани за време на претходните несогласувања меѓу Зеленски и Трамп.

Извор: „Блумберг“