Апликацијата м.Услуги ќе содржи дигитални верзии на лични документи и електронски услуги.

Министерството најавува дека безбедноста и заштитата на личните податоци се во завршна фаза на усогласување.

Тест-верзијата на новата апликација досега ја презеле околу 6.000 граѓани.

м.Услуги ќе биде новата мобилна апликација преку која граѓаните ќе можат на едно место да пристапуваат до личните документи во дигитална форма и до електронските услуги на државната администрација.

Слушнете го Канал 77 радио во живо онлајн!

Министерот за дигитална трансформација, Стефан Андоновски, во гостување во емисијата „Вести плус“ на Канал 5 Телевизија официјално најави дека промоцијата на апликацијата е планирана за октомври.

• Можам официјално да најавам дека во октомври ќе организираме настан на кој ќе ја промовираме мобилната апликација м.Услуги. Во неа ќе бидат достапни електронски верзии на личната карта и возачката дозвола, како и две електронски услуги за граѓаните – истакна Андоновски.

Преку апликацијата, според Министерството за дигитална трансформација, граѓаните треба да добијат поедноставен пристап до документи и административни услуги без потреба од физичко присуство во институциите.

м.Услуги треба да ги донесе личните документи во дигитална форма

Дигиталните документи се еден од главните сегменти на новата апликација. Личната карта и возачката дозвола ќе бидат достапни преку мобилен телефон, заедно со електронски услуги на администрацијата.

Целта, како што се наведува во соопштението, е државните услуги да станат подостапни, побрзи и поедноставни за користење.

Министерството во изминатиот период работело на прашањата поврзани со сајбер-безбедноста, заштитата и чувањето на личните податоци, како и на нивната размена со Министерството за внатрешни работи.

Андоновски вели дека системот се наоѓа во завршна фаза на подготовка пред официјалното пуштање во употреба.

-Во завршна фаза сме на усогласување и потпишување на протоколот за размена на податоците, како и на тестирањето на апликацијата. Сакаме, пред таа да биде достапна за сите, да бидеме сигурни дека системот е стабилен, безбеден и едноставен за користење. Апликацијата ќе биде достапна на App Store и Google Play, а нејзината тест-верзија досега ја презедоа околу 6.000 граѓани – рече Андоновски.

Мобилниот телефон како дигитален паричник

Следниот чекор во процесот на дигитална трансформација е мобилниот телефон постепено да стане своевиден дигитален паричник преку кој граѓаните ќе можат да пристапуваат до своите документи и државните услуги.

Идејата е што поголем број административни процедури да станат достапни преку една мобилна платформа, со намалување на потребата од шалтери, хартиени документи и физичко присуство во институциите.

Апликацијата м.Услуги најпрво треба да понуди ограничен број документи и услуги, а во наредниот период се очекува постепено проширување на функционалностите.

Официјалната промоција е најавена за октомври, кога јавноста треба да добие повеќе детали за начинот на функционирање и можностите што ќе ги нуди новата мобилна платформа.

Слушајте го Канал 77 радио во живо КЛИКНЕТЕ ТУКА