Белгиски медиуми: Уапсена е Федерика Могерини, поранешната висока претставничка на ЕУ

По претресите што од претпладнето ги спроведе Белгиската федерална полиција во Колеџот на Европа во Бриж, Белгија и во дипломатската служба на ЕУ во Брисел, како дел од голема европска истрага за измама, уапсени се тројца осомничени откако им беше укинат правниот имунитет. Оваа информација ја објавија неколку медиуми, меѓу кои Еуроактив и Белгиската новинска агенција. Меѓу тројцата уапсени, наводно е и  поранешната висока претставничка на ЕУ за надворешна политика, Федерика Могерини, сега ректорка на колеџот.

Европската комисија одби да коментира во среда за време на дневниот брифинг за медиумите. Портпаролот потврди дека полицијата била присутна во зградите на ЕЕАС „како дел од тековната истрага за активностите за време на претходниот мандат“ и додаде дека Комисијата не може да даде дополнителни детали додека истрагата продолжува. Портпаролот, исто така, одби да коментира за лица кои би можеле да бидат вклучени, соопшти Белгиската новинска агенција.

Според медиските информации, операцијата е спроведена по барање на Канцеларијата на Европскиот јавен обвинител (EPPO) и поддржана од OLAF, канцеларијата на ЕУ за борба против измами. Полицијата, исто така, ги претресе домовите на осомничените.

Случајот се фокусира на Дипломатската академија на Европската унија, деветмесечна програма за обука за помлади дипломати од земјите-членки на ЕУ. Програмата му беше доделена на Колеџот на Европа за периодот 2021-2022 година по официјален тендер организиран од Европската служба за надворешна акција (ЕЕАС).

Истражителите испитуваат дали Колеџот на Европа, или лица поврзани со него, имале однапред пристап до доверливи критериуми за избор пред официјалното објавување на тендерот. Според EPPO, постојат силни индикации дека можеби се прекршени правилата за фер конкуренција и дека доверливи информации биле споделени со еден од кандидатите.

Според VRT NWS и весникот L’Echo, покрај Могерини, меѓу уапсените е и Стефано Санино, поранешен генерален секретар на ЕЕАС. Овие имиња не се официјално потврдени од истражителите.

фото: Влада.мк

©Kanal77.мк Крадењето авторски текстови е казниво со закон. Преземањето на авторски содржини (текстови и фотографии) од оваа страница е дозволено само делумно и со ставање хиперлинк до содржината што се цитира. Услови за превземање

Сподели:

Facebook
Twitter
LinkedIn
Email

НАЈЧИТАНИ ВЕСТИ